Mobile AppDownload and get updated news
తలాక్, తలాక్, తలాక్.. ఇలా మూడు సార్లు ఈ పదాన్ని ఎవరైనా భర్త తన భార్యముందు పలికితే ఇక వారి సంసారాన్ని కాకెత్తుకెళ్లినట్లే. నూరేళ్ల వారి కాపురానికి ముగింపు పలికినట్లే. ముస్లిం సంప్రదాయం ప్రకారం తలాక్ పదాన్ని మూడుసార్లు పలికితే విడాకులు మంజూరైనట్లే. ఇంత ఈజీగా వివాహ బంధాన్ని తెగతెంపులు చేసుకునే విధానం పట్ల ఎప్పటి నుండో ముస్లిం మహిళలతో పాటు, విద్యాధిక ముస్లింలలో అసంతృప్తి ఉంది. ఇది చాలా అన్యాయమని, మహిళలను చరాస్థులుగా భావించే వారి ఆటలకు ఈ తలాక్ మరింత ఊపునిస్తుందని మహిళా సంఘాలు ఎప్పటినుండో ఆగ్రహం వ్యక్తం చేస్తూనే ఉన్నాయి. గతంలో చాలామార్లు ఫోను ద్వారా తలాక్ చెప్పి విడాకులు తీసుకున్న వారు కూడా ఉన్నారు. ఇప్పుడు ఫేస్ బుక్ లాంటి సామాజిక సైట్ల ద్వారా కూడా తలాక్ చెప్పేస్తున్నారని వార్తలు వస్తున్నాయి. దేశంలో ఇప్పటికి ఉమ్మడి సివిల్ కోడ్ లేదు. ముస్లింలకు ప్రత్యేకంగా పర్సనల్ లా బోర్డ్ ఉంది. ఈ బోర్డు పెద్దలు తలాక్ విధానానికి ముగింపు పలికేందుకు ఏమాత్రం ఒప్పుకోవడం లేదు. ఈ విధానంపై దేశ న్యాయస్థానాలు విచారణకు చొరవచూపడాన్ని కూడా ముస్లిం పర్సనల్ లా బోర్డు ఏమాత్రం సహించదు. ఇది మా మత విశ్వాసాలకు భంగం కలిగించడమేననేది వారి వాదన. ఈ నేఫథ్యంలో ఒక ముస్లిం మహిళ తలాక్ విడాకుల విధానాన్ని వ్యతిరేకిస్తూ సుప్రీంకోర్టును ఆశ్రయించింది. మూడు సార్లు తలాక్ చెప్పగానే విడాకులు ఇచ్చేసే విధానం తనలాంటి మహిళలకు అన్యాయం చేస్తోందని ఆమె తన ఫిర్యాదులో ఆరోపించింది. ఇది రాజ్యాంగ వ్యతిరేకమని ఆమె ఆవేదన వ్యక్తం చేసింది. ఆమె ఫిర్యాదును స్వీకరించిన సుప్రీం ధర్మాసనం, అసలు తలాక్ విడాకుల విధానానికి చట్టబద్దత ఉందోలేదో విచారించాలని సోమవారం నాడు నిర్ణయించింది. ఇందులో భాగంగా దేశంలోని ముస్లిం, ముస్లిమేతర మేధావుల అభిప్రాయాలు, మత పెద్దలు, ముస్లిం మహిళళ సూచనలు, సలహాలు తీసుకోవాలని భావిస్తోంది.