డ్యాన్స్‌తో పనేంటో నాకు అర్థంకాలేదు -రానా

2015 ముగింపుకి వచ్చి ఇంకొద్ది రోజుల్లో 2016కి స్వాగతం పలకబోతున్న నేపథ్యంలో ప్రముఖ ఇంగ్లీష్ మేగజైన్ టైమ్స్ ఆఫ్ ఇండియా టాలీవుడ్ టాలెస్ట్ హీరో రానా దగ్గుబాటితో ముచ్చటించింది. 2015 సంవత్సరం రానాకి ఎలాంటి అనుభూతిని మిగిల్చిందో అడిగి తెలుసుకుంది. 2015లోనే రానా తాతయ్య రామానాయుడు ఈ లోకాన్ని విడిచి వెళ్లిపోయారు. ఈ ఏడాది చివర్లోనే రానా సోదరి మాళవికకి కూతురు 'ఐరా' పుట్టింది. అంటే రానాకి కొత్త కోడలు వచ్చేసిందన్నమాట. ఇండియన్ సినిమాలో ఓ ప్రత్యేకమైన గుర్తింపుని సొంతం చేసుకున్న బాహుబలి విడుదలైంది ఈ ఏడాదే. బాహుబలి సినిమాతో రానా కెరీర్ మరో కొత్త టర్న్ తీసుకుంది. అలాగే బాహుబలి తర్వాత మళ్లీ అంతటి ప్రాధాన్యత కలిగిన చిత్రం రుద్రమదేవి. ఈ సినిమాలోనూ ఓ ప్రధాన పాత్ర పోషించి సిసలైన హీరోయిజానికి ఓ కొత్త అర్థం చెప్పాడు రానా. వీటికితోడు బాలీవుడ్‌లో అక్షయ్ కుమార్‌తోపాటు కలిసి నటించిన బేబీ మూవీ సైతం ఆడియెన్స్ ముందుకు వచ్చింది ఈ 2015లోనే. ఈ సినిమా లైఫ్ సంగతిని కాసేపు పక్కనబెడితే... ఏడాది చివర్లో చెన్నైని అతలాకుతలం చేసిన భారీ వర్షాలు, వరదలు చూసి చలించిపోయిన రానా... నేరుగానే సహాయ కార్యక్రమాల్లో పాల్పంచుకుని తన సున్నిత మనస్తత్వాన్ని చాటుకున్నాడు. ఇలా వివిధ రకాల అనుభూతులని అందించిన 2015 గురించి రానా ఏం చెబుతాడో తెలుసుకునే ప్రయత్నం చేసింది టైమ్స్ ఆఫ్ ఇండియా. టైమ్స్ ఇంటర్వ్యూలోంచి క్లుప్తంగా కొన్ని ముఖ్యాంశాలు.
2015 మీకు ఎలా అనిపించింది ?
2015ని నేను ఎప్పటికీ మరిచిపోలేను. తాతయ్య మమ్మల్ని వీడిపోయిందీ ఈ సంవత్సరంలోనే. అలాగే 'ఐరా' మా ఇంట్లోకి అడుగుపెట్టింది కూడా ఈ ఏడాదే. ఇక సినిమాల విషయానికొస్తే, బేబీ, బాహుబలి, రుద్రమదేవి సినిమాలు 2015లో క్షణం తీరిక లేకుండా చేశాయి. బాహుబలి షూటింగ్‌లో వుండగా నా మోకాలికి గాయమైంది. అలా నేను 2 నెలలు గ్యాప్ తీసుకున్నాను. అదే సమయంలో మళ్లీ ప్రభాస్ భుజానికి గాయమైంది. దీంతో మరో మూడు నెలలు షూటింగ్‌కి గ్యాప్ దొరికింది. ఆ ఐదు నెలలు నేను ఖాళీగా వున్న సమయంలోనే బాలీవుడ్‌లో బేబీ సినిమా కోసం నీరజ్ పాండే నుంచి కాల్ వచ్చింది. మళ్లీ ఆ తర్వాత బాహుబలి, రుద్రమదేవి సినిమాల షూటింగ్. అలా క్షణం తీరికలేకుండా గడిచిపోయిందీ సంవత్సరం. నటుడిగా పాత్రల ఎంపిక విషయంలో ఒక ఛట్రంలో ఇరుక్కుపోవడం నాకు ఏ మాత్రం ఇష్టంలేదు. అందుకే భిన్నమైన పాత్రలు ఎంచుకోవడానికి ఏ మాత్రం వెనుకాడను. ఆ నిర్ణయమే బాహుబలిలో భల్లాలదేవగా నన్ను హైలైట్ చేసింది అంటున్నాడు రానా. బాహుబలిలో విలన్ రోల్ చేస్తున్నాను అని తెలిసి నన్ను చాలామంది హెచ్చరించారు. ఇంకొందరు భయపెట్టారు. కానీ ఆ సినిమా వారి అంచనాలన్నీ తప్పని నిరూపించింది. చిన్నప్పటి నుంచి అటువంటి కథలే చదువుతూ పెరిగాను. రాజమౌళి గారు కథ చెప్పినప్పుడు కరెక్టుగా ఆ కథలే నా కళ్ల ముందు మెదిలాయి.
డ్యాన్స్ విషయంలో మీ అభిప్రాయం ఏంటి ? డ్యాన్సింగ్‌పై ఎందుకు దృష్టిపెట్టరు ?
డ్యాన్సింగ్ అంటే ఎందుకో నాకదంతగా అవసరం లేదనిపిస్తుంది. డ్యాన్స్‌తో అవసరం ఏంటో నాకు ఇప్పటివరకు అర్థమవలేదు. అయినా అందరూ డ్యాన్స్ చేస్తున్నారు కదా.. ఇంకా నేనెందుకు చెప్పండి! 'నా ఇష్టం' సినిమాలో అయిష్టంగానే కొంచెం ట్రై చేశాను. కానీ ఎందుకో నాకదంత నచ్చలేదు. ఇకపై అటువంటి సినిమాలు కూడా చేయదల్చుకోలేదు.
మరి పెళ్లి సంగతేంటంటారు ?
ప్రస్తుతానికి నాకిలాగే బాగుంది. నేనెవరితోనూ రిలేషన్‌షిప్‌లో లేను. పెళ్లికి ఇంకాస్త టైమ్ పడుతుంది.