వంటసోడా అద్భుతాలు తెలుసా?

ఖరీదైన కాస్మొటిక్ ఉత్పాదనలకు దీటుగా మన వంటింట్లోని బేకింగ్ సోడా(తినేసోడా లేదా వంటసోడా) పనిచేస్తుందనే సంగతి చాలామందికి తెలియదు. బేకింగ్ సోడా ఉపయోగాలు ఇన్నీ అన్నీ కావు. దాన్ని కేవలం వంటల్లోనే కాదు.. సౌందర్య సాధనంగా కూడా చాలా కాలం నుండి ఉపయోగిస్తున్నారు. అందులోని క్రిస్టలైన్ కాంపోజిషన్లో గల యాంటీ బ్యాక్టీరియల్, యాంటీ ఫంగల్, యాంటీ సెప్టిక్ లక్షణాలు దాని ప్రత్యేకతకు కారణం. ఎవరైనా దాన్ని నిక్షేపంగా తమ సౌందర్యాన్ని ఇనుమడింపచేసుకోవడానికి ఉపయోగించుకోవచ్చని నిపుణులు చెపుతున్నారు. అవసరమైన వేళల్లో దాన్ని పేస్ వాష్ గా, ఫేస్ మాస్క్ గా ఉపయోగించుకోవచ్చు. అది ఎక్స్ఫోలియేటర్ గా ఉపయోగపడుతుంది. ఎండ వేడిమి వల్ల కమిలిపోయిన ముఖానికి, శరీరానికి అది ఉపశమనం కలిగిస్తుంది. శరీరంలోని మృతకణాలను తొలగించడమే కాకుండా నల్లబడిన శరీరాన్ని తెల్లబరుస్తుందని ప్రముఖ మేకప్ ఆర్టిస్ట్ మీనాక్షి దత్ చెప్పారు.

ఫేసియల్స్ కు వెళ్లేంత సమయంలేనప్పుడు వంటింట్లోని బేకింగ్ సోడా అద్భుతంగా అక్కరకొస్తుంది. దాన్ని నిమ్మరసంతో కలిపి ముఖంపై రాయడం వల్ల మంచి ఫలితం లభిస్తుంది. నిద్రకు ముందు దాన్ని డ్రై షాంపూగా కూడా ఉపయోగించుకోవచ్చు. శరీరంలోని ట్యాన్ తొలగిస్తుందిది. అంతే కాదు అండర్ ఆర్మ్స్, మోచేతులు, మోకాళ్లపై నలుపును ఇది పోగొడుతుంది. ఒక స్పూన్ బేకింగ్ సోడాకు సమానంగా నిమ్మరసం కలిపి గట్టి మిశ్రమంగా తయారుచేసి ఆయా ప్రాంతాల్లో సమానంగా రాసి పదినిమిషాల తరువాత కడిగేయాలి. అలా కొంత కాలం చేసి ఫలితం చూడండి. మీరే ఆశ్చర్యపోతారు.