పోలీసు వేషమేసి అరెస్టైన భార్య

ఇదిగో ఇక్కడ ఫోటోలో కనిపిస్తున్న ఈ 24 ఏళ్ల యువతి పేరు ప్రియాంకా పటేల్. గుజరాత్‌లోని అహ్మెదాబాద్‌కి చెందిన ప్రియాంకాకి ఈమధ్యే పెళ్లయ్యింది. ఇంట్లో అత్తమామలతోపాటు మొగుడిగా భర్త ఆధిపత్యం చూసి భరించలేకపోయిన ప్రియాంకాకి ఇటీవలే తన పుట్టింటింకి వెళ్లినప్పుడు ఓ బంపర్ ఐడియా వచ్చింది. ఆ బంపర్ ఐడియానే ఇప్పుడామెని నిందితురాలిగా ఇలా కోర్టు ముందు నిలబెట్టింది. ఇంతకీ ఆమెకొచ్చిన ఆ ఐడియా ఏంటనే కదా మీ డౌట్! మరేం లేదండీ.. ఇంట్లో ఖాళీగా వున్నాననే కదా భర్త తనని వేధిస్తున్నాడు. అదే తనకీ ఓ జాబ్ వుంటే... అది కూడా పోలీసు డిపార్టుమెంట్‌లో ఉద్యోగం అయితే మరీ బావుంటుంది కదా అని అనుకుందామె. అలా అయితే, భర్త తన చెప్పుచేతల్లో వుంటాడు. అత్తింటివారూ మర్యాదనిస్తారు అని భావించిన ప్రియాంకా వెంటనే మధ్యప్రదేశ్‌లోని తన పుట్టింటికి వెళ్లినప్పుడే రైల్వే ప్రొటెక్షన్ ఫోర్స్ యూనిఫామ్ కుట్టించుకుంది. ఆ తర్వాత ఇంటికిరాగానే... ఇక నేనెవ్వరికీ భయపడక్కర్లేదు... హమ్ కిసీసే కమ్ నహీ అంటూ భర్తకి కాస్త గట్టిగానే చెప్పింది. తనకి రైల్వే ప్రొటెక్షన్ ఫోర్స్‌లో కానిస్టేబుల్ జాబ్ వచ్చిందని భర్తని, అత్తింటివారిని నమ్మబలికింది. అంతేకాకుండా రోజూ ఉదయం తనని కలూపూర్ రైల్వే స్టేషన్ వద్ద డ్రాప్ చేయాల్సిందిగా భర్తని అడిగింది. అలా పది రోజులపాటు ఆమెని అతడు కులూపూర్ రైల్వే స్టేషన్ వద్ద దించేసి వెళ్లడం... ఆమె సాయంత్రం వరకు టైమ్ పాస్ చేసి ఏదో డ్యూటీ చేసి వస్తున్నట్టుగా సొంతంగానే తిరిగి ఇంటికెళ్లడం జరిగిపోయింది. ఇలా అంతా బాగానే జరిగిపోతోంది అని అనుకుంటున్న తరుణంలోనే ఓరోజు ఆమె రైల్వే స్టేషన్ వద్ద విధుల్లో వున్న మరో ఇద్దరు లేడీ కానిస్టేబుల్స్ కంట్లో పడింది.

ప్రియాంకాని చూడటంతోనే ఆమెని అక్కడే ఆపిన ఆ ఇద్దరు కానిస్టేబుళ్లు... నిన్ను ఎప్పుడూ ఇక్కడ చూడలేదే అని ఆరాతీయడం మొదలుపెట్టారు. పనిలో పనిగా ఎక్కడ శిక్షణ తీసుకున్నావ్ అని అడిగారు. ఈ ప్రశ్నలన్నింటికి ప్రియాంకా తడబడుతూ సమాధానాలివ్వడంతో అనుమానం వచ్చిన ఆ ఇద్దరు కానిస్టేబుళ్లు ప్రియాంకని పోలీస్ స్టేషన్‌కి తీసుకెళ్లారు. అక్కడ ప్రియాంక బాగోతం అంతా బయటపడింది. ఏం చేయాలో అర్థం కానీ పరిస్థితుల్లో జరిగిన పొరపాటుని అంగీకరించిన ప్రియాంకా... అలా ఎందుకు చేయాల్సి వచ్చిందో కూడా వివరించింది. ఎంతైనా మంచిది అని రైల్వే స్టేషన్‌లోని సీసీటీవీ ఫుటేజీ చెక్ చేశారు. రోజూ ఆమె మణినగర్ రైల్వే స్టేషన్ వరకు వెళ్లడం... అక్కడి మహిళా కానిస్టేబుళ్లతో కలిసి సాయంత్రం వరకు కాలక్షేపం చేయడం తప్పించి ఆమె ఇంకా ఎటువంటి ఇతర నేరాలకి పాల్పడినట్టు అందులో కనిపించలేదు. కానీ పోలీసు యూనిఫారమ్ వేసుకుని ప్రభుత్వ ఉద్యోగిగా నమ్మించిన నేరానికిగాను 170, 171 ఐపీసీ సెక్షన్ల కింద ఆమెపై కేసు నమోదైంది. తర్వాత ప్రియాంకని కోర్టులో హాజరుపరిచారు. అక్కడే ఆమె బెయిల్ మంజూరైంది. అలా విషయం పోలీసులు, కోర్టు వరకు వెళ్లడంతో ఇంట్లో సమస్య కూడా సాల్వ్ అయిపోయిందామెకి.