ఆవు చేలో మేస్తే దూడ గట్టున మేస్తుందా అని మన పెద్దలు అప్పుడప్పుడు అంటూ ఉంటారు. ఇంట్లో తల్లితండ్రులు ఎలాంటివారయితే వారి పిల్లలు కూడా అలాగే పెరుగుతారని దాని అర్థం. ఈ ప్రకారం చూస్తే ముస్కాన్ కూడా తన తల్లికి మాదిరిగానే సెక్స్ వర్కర్ అవతారం ఎత్తిఉండాలని కోరుకునేది. కానీ, అలా జరగలేదు. మిగిలిన ఆడపిల్లల్లా ముస్కాన్ కూడా తన రంగుల భవిష్యత్తు గురించి కలలు కంటుంది. వాటిని సక్రమ మార్గంలో నిజం చేసుకోవాలని ఆమె ఆశపడుతుంటుంది. తన తల్లి వృత్తిని చేయాలని ఆమే కాదు, ఆ ప్రాంతంలోని సెక్స్ వర్కర్ల సంతానంలో చాలామంది కోరుకోవడం లేదు. పైగా బాగా చదువుకుని సమాజంలో ఉన్నత స్థానంలో నిలవాలని ఆశపడుతున్నారు.
పొట్టకూటికోసమో.. వేరే ఇతర కారణాలతోనో సెక్స్ వర్కర్ల అవతారం ఎత్తిన వారి తల్లులు కూడా తమ బిడ్డలను ఆ రొంపిలో ఉంచాలని కోరుకోవడం లేదు. రెడ్ లైట్ ఏరియాలో చాలాకాలంగా సెక్స్ వర్కరుగా జీవిస్తున్న మధ్యవయస్కురాలు తన కుమారుడిని ఎంతో కష్టపడి సాఫ్ట్ వేర్ ఇంజనీర్ చేసింది. ఆమె కుమార్తె ప్రస్తుతం బి.కామ్ చదువుతుోంది. ఇంకొక కుమార్తె ఇంటరును 78శాతం మార్కులతో పాసయి తన ప్రతిభను నిరూపించుకుంది.
ఇప్పటివరకు 29మంది వరకు సెక్స్ వర్కర్ల పిల్లలు తమ బ్యాచిలర్స్ డిగ్రీలను మంచి మార్కులతో పూర్తిచేయడం విశేషం. ఇంకొందరు న్యాయవాద వృత్తిలో దిగాలని ఆశపడుతూ ఎల్ఎల్.బి. విద్యను అభ్యసిస్తున్నారు. ఎనిమిదిమంది ఉపాధ్యాయవృత్తిపట్ల ఆకర్షితులై బీఈడీ చేస్తున్నారు. వీరందరి ఆశలు, కలలు సాకారమవడం వెనుక మంజూ సింగ్ అనే ఒక స్వచ్చంద సంస్థ కార్యకర్త ఉన్నారు. ప్రతీ రోజు రెడ్ లైట్ ఏరియాలో తిరుగుతూ ఆమె సెక్స్ వర్కర్లలో చైతన్యం తీసుకువచ్చారు. సెక్స్ వర్కర్ల బిడ్డలకు చదువులు చెప్పించడం వలన కలిగే ప్రయోజనాల గురించి వారికి అర్థమయ్యేలా చెప్పారు. ఇటీవలే ఆమె రాష్ట్రపతి ప్రణబ్ ముఖర్జీ నుండి నారీ శక్తి అవార్డును కూడా అందుకున్నారు.
రెండో తరపు సెక్స్ వర్కర్లు సమాజానికి దాపురించకుండా, వారి జీవితాలను కాపాడేందుకు ఆమె పడే కష్టం ఇంతంత కాదు. భూమిపై జీవించాలంటే దానికి వ్యభిచారం ఒక్కటే మార్గం కాదని చెప్పేందుకు ఆమె తన స్వచ్చంద సంస్థ ఆధ్వర్యంలో కంప్యూటర్, నర్సింగ్ తదితర అంశాల్లో వృత్తివిద్యా కోర్సులను వారికి ఉచితంగా బోధింపచేస్తున్నారు. ఆమె ద్వారా విద్యను అభ్యసించి ఉన్నత స్థానానికి వచ్చిన వారిలో పలువురు ఇంజినీర్లు, కస్టమ్ అధికారులు, టీచర్లు, న్యాయవాదులు, నర్సులు కూడా ఉన్నారు. అంతేకాదు ముగ్గురు సెక్స్ వర్కర్ల కుమారులు సైన్యంలో కూడా చేరడం విశేషం. చాలామంది బిడ్డలు వృద్ధిలోకి వచ్చిన తరువాత తమ తల్లులను ఆ రెడ్ లైట్ ఏరియా అనే మురికి కూపం నుండి తమతో తీసుకెళ్లిపోయారని, వారంతా తమ బిడ్డల నీడలో సరికొత్త జీవితాలను ప్రారంభించారని మంజూ సింగ్ చెప్పారు. హ్యాట్సాఫ్ టూ మంజూ సింగ్.
Mobile AppDownload and get updated news