ఇప్పటివరకు కేంద్రమంత్రి.. ఇకపై ముఖ్యమంత్రి

అస్సాంలో అసెంబ్లీ ఎన్నికల్లో గెలుపొందడం ద్వారా తొలిసారిగా ఈశాన్య భారత దేశంలోని ఓ రాష్ట్రంలో ప్రభుత్వాన్ని ఏర్పాటు చేసే అవకాశాన్ని చేజిక్కించుకుంది బీజేపి. అస్సాంలో గత మూడుసార్లుగా వరుసగా గెలుస్తూ వచ్చిన కాంగ్రెస్ పార్టీ ఈసారి బీజేపీ చేతిలో ఓటమిపాలైంది. ఎన్నికల ప్రచారం మొదలైనప్పటి నుంచి సర్బానంద సోనోవాల్ ఆ రాష్ట్రానికి బీజేపీ తరపున సీఎం అభ్యర్థిగా రేసులో వున్నారు. ఆ పార్టీ ఆశించినట్టుగానే అస్సాంలో గెలుపొందిన నేపథ్యంలో త్వరలోనే సోనోవాల్ ఆ రాష్ట్రానికి సీఎం అయ్యే అవకాశం వుంది. ఈ నేపథ్యంలో సర్బానంద సోనోవాల్ రాజకీయ ప్రస్థానం గురించి క్లుప్తంగా తెలుసుకునే ప్రయత్నం చేద్దాం.

1) తనని తాను సకలోర్ ఆనంద సబర్బానందగా చెప్పుకోవడం సోనోవాల్‌కి అలవాటు. 'ప్రతీ ఒక్కరి ఆనందమే తన ఆనందం' అని తనని తాను అలా పరిచయం చేసుకోవడం వెనుకున్న అర్థం. అస్సాం రాజకీయాల్లో ఫైర్‌బ్రాండ్‌గా పేరున్న ఈ బ్రహ్మచారి వయస్సు 53 ఏళ్లు. ఒరిస్సాలో పుట్టిన సోనోవాల్... అస్సాంలో అంచెలంచెలుగా కీలక నేతగా ఎదిగాడు.

2) ప్రస్తుతం కేంద్ర కేబినెట్‌లో సభ్యునిగా వున్న సోనోవాల్.. యువజన, క్రీడాశాఖకి సహాయమంత్రిగా బాధ్యతలు నిర్వర్తిస్తున్నారు.

3) విద్యార్థి దశ నుంచే అక్రమ వలసలపై గళమెత్తిన నేతగా సోనోవాల్‌కి గుర్తింపు వుంది.

4) ఆల్ అస్సాం స్టూడెంట్స్ యూనియన్(ఏఏఎస్‌యు)తో సోనోవాల్ తన రాజకీయ ప్రస్థానం మొదలుపెట్టారు. తర్వాతి కాలంలో ఇదే ఏఏఎస్‌యు కాస్తా అస్సాం గన పరిషత్(ఏజీపీ)గా రూపుదిద్దుకుంది.

5) 2001లో సోనోవాల్ ఏజీపీలో చేరారు. అదే ఏడాది మోరాన్ నియోజకవర్గం నుంచి ఎమ్మెల్యేగా అసెంబ్లీలో అడుగుపెట్టారు.

6) 2004లో ఏజీపీ తరపున దిబ్రుఘర్ లోక్‌సభ నియోజకవర్గం నుంచి పార్లమెంట్ సభ్యుడిగా ఎన్నికయ్యారు.

7) పదేళ్లపాటు పార్టీలో కొనసాగిన సోనోవాల్ 2011లో పార్టీ పరమైన విభేదాలతో అందులోంచి బయటికి వచ్చేశారు.

8) అదే ఏడాది బీజేపీలో చేరి ఆ రాష్ట్రంలో కీలకనేతగా ఎదిగారు.

9) 2016, జనవరిలో సోనోవాల్‌ని అస్సాం రాష్ర్ట ముఖ్యమంత్రి అభ్యర్థిగా బీజేపీ అధినాయకత్వం ప్రకటించింది.

తనని గెలిపించి, రాష్ట్రాన్ని అభివృద్ధి చేసే అవకాశం ఇచ్చినందుకు సోనోవాల్ అస్సాం వాసులకి కృతజ్ఞతలు తెలుపుకున్నారు.