చాక్లెట్ గణేషుడు, పాలలో నిమజ్జనం

వినాయక చవితి పండగ వస్తే దేశవ్యాప్తంగా ఎంత సందడి ఉంటుందో ప్రత్యేకంగా చెప్పనవసరం లేదు. తొమ్మిది రోజుల పాటు ఒక్కో రీతిన గణేషుడ్ని పూజిస్తూ.. ఆటలు, పాటలు, తీన్మార్ డాన్సులతో ధూంధాంగా ఈ పండగ చేసుకుంటారు. అలాగే వైవిధ్యమైన ఆకారాలలో, వివిధ రకాల పదార్థాలతో గణేషుడి ప్రతిమలను తయారుచేస్తూ కొంతమంది తమ సృజనాత్మకతనూ చాటుకుంటారు. ఇప్పటివరకూ ముత్యాలతో గణేషుడు, వజ్రాలతో తయారు చేసిన గణేషుడు, కొబ్బరి కాయలతో తయారు చేసిన గణేషుడు, డబ్బుకట్టలతో, అగ్గిపెట్టెలతో, కొబ్బరిపీచుతో, పీచు మిఠాయితో ఇలా కాదేదీ వినాయకుడి విగ్రహ తయారీకి అనర్హం అన్నట్లుగా ఒక్కొక్కరూ ఒక్కో రకమైన గణేషుడి విగ్రహాలను తయారు చేస్తారు. అయితే అదే ఓ బేకరీ యజమానిని గణేషుడి విగ్రహం తయారు చేయమంటే ఏంచేస్తాడు. కేక్ తో విగ్రహం తయారుచేసి పెడతాడు. ఆయన అదే చేశాడు. పంజాబ్ రాష్ట్రంలో లూధియానా బేకరీ యజమాని అయిన హర్జిందర్ కుజ్రెజా అనే వ్యక్తి వెరైటీగా చాక్లెట్ తో గణేషుడి విగ్రహాన్ని తయారు చేశాడు. అంతేకాదు ఈ విగ్రహాన్ని అందరిలాగా నీళ్లలో కాకుండా పాలలో నిమజ్జనం చేస్తాడంట. అలా పాలలో నిమజ్జనం చేసిన ఈ చాక్లెట్ గణేషుడు అది కరిగిపోయిన తర్వాత వచ్చే 'చాకో మిల్క్' ను పేద పిల్లకు తాగటానికి అందిస్తాడంట. హర్జిందర్ ఆలోచన బాగుంది కదూ? ఏదైమైనా హర్జిందర్ ప్రయత్నాన్ని మెచ్చుకోవాల్సిందే. ఎకో ఫ్రెండ్లీ గణేషుడ్ని తయారు చేయడమే కాకుండా, ఆ గణేషుడు పిల్లలకు ఇష్టమైన ప్రసాదం రూపంలో వెళ్లడం నిజంగా అభినందనీయం.