మన కళ్ల ముందు తోటి వారికి ఏదయినా హాని జరుగుతున్నా పట్టించుకోవడానికి సమయం లేని కాలమిది. అలాంటిది ఒక చెట్టును కాపాడేందుకు ఆ వ్యక్తి గొప్ప నిర్ణయమే తీసుకున్నారు. తన కళ్లముందే కళకళలాడే చెట్టును వ్యాపార అవసరాల కోసం దుకాణదారు నరికేయకుండా అడ్డుకోవడానికి ఆయన ఏకంగా ఆ దుకాణాన్నే తొమ్మిదేళ్లకు లీజుకు తీసుకున్నారు. నరికివేత నుండి చెట్టును కాపాడేందుకు నెలకు రూ.60వేల అద్దెను చెల్లించేందుకు కేవలం సెకన్ల వ్యవధిలోనే నిర్ణయానికి వచ్చి ఆ వెంటనే లీజ్ అగ్రిమెంట్ కూడా రాయించుకున్నారు. అహ్మదాబాద్ నగరంలోని ధనికుల లొకాలిటీలో ఇది జరిగింది. సదరు దుకాణం వెలుపల కాసియా చెట్టు ఉంది. ఆ చెట్టు కారణంగా తన దుకాణం ఎవరికీ కనిపించకుండా పోతోందని, వ్యాపారం ఆశించిన రీతిలో జరగడం లేదని బావించిన యజమాని ఒక రోజు దాన్ని నరికివేయమని కొందరు కూలీలను పురామాయించాడు. ఆ దుకాణానికి పై అంతస్తులో ఉండే సంజయ్ రావల్ అనే వ్యక్తి దాన్ని గమనించారు. వెంటనే కిందకు వెళ్లి ఆ కూలీలు చెట్టును నరకడాన్ని అడ్డుకున్నారు. ఆ చెట్టు కారణంగా తన వ్యాపారం జరగడం లేదని ఆ దుకాణ యజమాని వాదించాడు. అంతే వెనకాముందూ ఆలోచించకుండా సంజయ్ రావల్ ఆ దుకాణాన్ని నెలకు రూ. 60వేలు చెల్లించి అద్దెకు తీసుకుంటానని ప్రతిపాదించారు. ఏదో తొందరపాటులోనో.. లేదా మాట వరుసకో కాదు. సీరియస్ గానే. ఒక నెలా రెండు నెలలు కాదు. మూడు సంవత్సరాలకు అగ్రిమెంట్ కుదుర్చుకుని అడ్వాన్సు కూడా చెల్లించేందుకు ముందుకు వచ్చారు. ఆ మూడేళ్ల తరువాత కూడా చెట్టును నరకరాదని ఇందుకు అవసరమైతే ఆ తరువాత మరో ఆరేళ్లు (మొత్తం 9 ఏళ్లు) కూడా షాపును లీజుకు తీసుకుంటానని చెప్పడంతో షాపు యజమాని ఒప్పుకున్నాడు. ఆ వెంటనే ఇద్దరి మధ్య ఒప్పందం కుదరడం, సంజయ్ రావల్ డబ్బు చెల్లించడం జరిగిపోయింది. పాలన్పూర్ ప్రాంతానికి చెందిన సంజయ్ అహ్మదాబాద్ నగరంలోని ఒక నిర్మాణ ప్రాజెక్టును చూసుకోవడానికి మకాం మార్చారు. ఆ చెట్టు వద్ద గల దుకాణంపై అంతస్తు భాగాన్ని అద్దెకు తీసుకున్న కొద్ది రోజులకు చెట్టు కోసం అగ్రిమెంట్ కార్యక్రమం జరిగింది. ఎంతయినా గ్రేట్ కదా ఆయన. ![]()
(నవ గుజరాత్ టైమ్స్ సౌజన్యంతో)
Mobile AppDownload and get updated news
