భోగభాగ్యాలిచ్చే ‘పంటల పండుగ’

చల్లటి గాలులలో... వెచ్చని భోగీ మంటలని తెచ్చేది సంక్రాంతి. కరవు కాలాన్ని దాటి పంటలని రైతుల చేతులకందించేది సంక్రాంతి. కమ్మని పిండి వంటల సువాసనలు, అందమైన రంగవల్లులు, హరిదాసుల పాటలు, పాలపొంగులు, పూల తోరణాలు, ఎగిరే పతంగులు... సంక్రాంతి శోభకి తార్కాణాలు. దీనిని రైతన్నలు పంటల పండుగ అని కూడా పిలుచుకుంటారు. పల్లెల్లన్నీ సంక్రాంతికి కోలాహలంగా మారిపోతాయి. ఉద్యోగాల కోసం ఎక్కడెక్కడో ఉన్న వారంతా పెద్ద పండుగ కోసం పల్లెలకు చేరుకుంటారు. మూడు రోజుల పాటూ ముచ్చటగా సాగే ఈ పంటల పండుగ భోగభాగ్యాలని ప్రసాదిస్తుందని ప్రజల నమ్మకం.
సంక్రాంతి లేదా సంక్రమణము అంటే మారడం అని అర్థం. అంటే సూర్యుడు మొత్తం పన్నెండు రాశుల్లో వరుసగా ఒక్కో రాశిలోకి మారుతూ ఉంటాడు. అతడు మకరరాశిలోకి మారగానే వచ్చేదే మకర సంక్రాంతి. తెలుగువారి పెద్ద పండుగ. మకర సంక్రాంతి రోజున సూర్యుడు ఉత్తరాయణ పథంలో ప్రవేశిస్తాడు. ఆ రోజున స్వర్గ ద్వారాలు తెరిచే ఉంటాయని పెద్దలు చెబుతారు. ఉత్తరాయణంలో సంక్రాంతి రోజును పుణ్యదినంగా భావిస్తారు. ఆ రోజు దానాలు చేస్తే చాలా మంచిదని పురాణాలు చెబుతున్నాయి. ముఖ్యంగా ధాన్యం, ఫలాలు, విసనకర్ర, బట్టలు, కాయగూరలు, దుంపలు, నువ్వులు, చెరకులు మొదలైన వాటిని దానం చేస్తే బోలెడం పుణ్యం మూటగట్టుకోవచ్చు. ఇక గోవును దానం చేస్తే స్వర్గ వాసమే లభిస్తుందట.