హరీశ్ చొరవతోనే ఖేడ్‌లో భారీ విజయం 

ఖమ్మం: నారాయణఖేడ్ ఉప ఎన్నిక విజయంపై సీఎం కేసీఆర్ స్పందించారు. ఖమ్మం జిల్లా పర్యటనలో భాగంగా ఆయన మంగళవారం రోళ్లపాడులో భక్తరామదాసు ఎత్తిపోతల పథకానికి శంకుస్థాపన చేశారు. ఈ సందర్భంగా ఏర్పాటు చేసిన బహిరంగ సభలో మాట్లాడుతూ .. నారాయణ ఖేడ్ ఉప ఎన్నికల్లో టీఆర్ఎస్ ను గెలిచిపించినందుకు నియోజకవర్గ ప్రజలకు ఆయన కృతజ్ఞతలు తెలిపారు. నారాయణఖేడ్ ఉప ఎన్నిక విజయం కోసం కృషి చేసిన పార్టీ నేతలు, కార్యకర్తలకు సీఎం అభింనందించారు.

హరీష్ పై కేసీఆర్ ప్రసంశలు..

ఖేడ్ విజయంలో హరీశ్ రావు కీలక ప్రాత్ర పోషించారని..ఆయన చొరవతోనే పార్టీ భారీ విజయం సాధించిందన్నారు. ఈ సందర్భంగా సీఎం కేసీఆర్ హరీష్ రావుకు ప్రత్యేక అభినందనలు తెలిపారు. హైదరాబాద్ గ్రేటర్ ఎన్నికల బాధ్యత కేటీఆర్ కు అప్పగించినట్లే ..నారాయణ ఖేడ్ బాధ్యతలు తన మేనల్లుడు హరీష్ రావుకు అప్పగించిన విషయం తెలిసిందే. కేటీఆర్ కు అధిక ప్రాధాన్యత ఇస్తూ హరీష్ రావును తక్కువ చేసి చూస్తున్నారని గత కొన్ని రోజులుగా ఊహాగానాలు వెలువడుతున్నాయి. ఈ పుకార్లను తెరదించాలనే ఉద్దేశంతో హరీష్ రావుకు నారాయణ ఖేడ్ ఉప ఎన్నిక బాధ్యతను అప్పగించడం..ఎన్నికల్లో విజయం తర్వాత హరీష్ రావు ను ప్రత్యేకంగా ప్రశంసించడం వంటి పరిణామాలు చోటు చేసుకున్నాయి.