ప్రేమిస్తే... ప్రాణాలు తీసేస్తున్నారు!

ప్రేమకి తెలిసిందల్లా... ప్రేమించడమే. కులం, మతం, రంగు, రూపు... ఏవీ దానికి కనిపించవు. కేవలం గుండెలో ఉప్పొంగుతున్న ప్రేమ మాత్రమే కనిపిస్తుంది. ఆ ప్రేమని దక్కించుకోవడానికి పెద్దల్ని ఎదిరించేలా చేస్తుంది. కానీ పెద్దలు పిల్లల ప్రేమనే కాదు... వారి కన్నప్రేమని కూడా చంపేసుకుంటున్నారు. పరువు పేరు చెప్పి ప్రాణాలు తీసేస్తున్నారు. తమిళనాడులో పెరిగిపోతున్న పరువు హత్యలు ఇవే చెబుతున్నాయి... కేవలం ఒక్క తమిళనాడు రాష్ట్రంలోనే మూడేళ్లలో 81 పరువు హత్యలు జరిగినట్టు రికార్డులు చెబుతున్నాయి. కులాంతర వివాహం చేసుకున్న వారిలో 84 శాతం మందిని పెద్దలే విడదీశారు. ఇక్కడ చెప్పుకోవాల్సిన ముఖ్య విషయం... 81 హత్యల్లో ఏ ఒక్క నిందితుడికి శిక్ష పడక పోవడం.

రెండు రోజుల క్రితం తమిళనాడులోని ఉడుముల్ పేటలో అగ్రకులానికి చెందిన కౌసల్యను పెళ్లి చేసుకున్నాడని దళితుడైన శంకర్ ను రోడ్డుమీద కత్తులతో నరికి చంపారు. అడ్డొచ్చిన కౌసల్యను తీవ్రంగా గాయపరిచారు. ఆ హత్య చేసిన వారిని పోలీసులు పట్టుకున్నారు. వారు చెప్పిన దాని ప్రకారం... కౌసల్య బంధువే హత్యకు ప్లాన్ వేశాడు. కౌసల్య తండ్రి పరువు పోయిందంటూ ఏడుస్తుంటే... అతని బాధ తీర్చడం కోసమే చంపానంటూ పోలీసులకి చెప్పాడు. ఇలా ఒక్క శంకరే కాదు... అనేక మంది కులాంతర వివాహానికి బలైపోయారు. ముఖ్యంగా అబ్బాయి దళితుడై... అమ్మాయి అగ్రవర్ణానికి చెందితే... ఆ అమ్మాయి రక్తసంబంధీకులే అబ్బాయిని చంపించడమో లేక తమ కూతురినే చంపేయ్యడమో ఎక్కువగా చేస్తున్నట్టు ఎన్జీవోల పరిశీలనలో తేలింది. అదే అమ్మాయి దళితురాలై... అబ్బాయి అగ్రకులానికి చెందిన వాడైతే పెళ్లయిన కొన్ని రోజులకే వారిద్దరినీ విడదీసి... అమ్మాయికి 'జీవితంలో ఇంకెప్పుడు మా అబ్బాయిని కలవకు... 'అని గట్టిగా వార్నింగ్ ఇచ్చి వదిలేస్తున్నట్టు రికార్డులు చెబుతున్నాయి. అలా 84 శాతం మందిని పెద్దలు విడదీశారు. ఆ అమ్మాయిలంతా ఇప్పుడు ఒంటరిగా బతుకుతున్నారు. ఓ ఎన్జీవో చేసిన పరిశోధనలో ఈ విషయం తెలిసింది.


2014లో ఆరునెలల గర్భిణీ అయిన వైదేహిని దళితుడిని పెళ్లి చేసుకుందన్న కారణంగా... ఆమె తల్లే కిరాయి హంతకులతో చంపించింది. కన్నపేగు కన్నా... పరువే ముఖ్యమనుకునే ఇలాంటి తల్లులు, తండ్రులు, అన్నలు, తమ్ముళ్లు, బంధువులు... ఇప్పటికీ తమిళనాడులో చాలా ప్రాంతాల్లో ఉన్నారు. ప్రేమని పంచడం వారి దృష్టిలో తప్పు... అదే క్రూరమృగాల్లా మనిషిని వేటాడి చంపడం మాత్రం వారి దృష్టిలో పరువుతో కూడిన పని.