కథ: హైదరాబాద్‌లో టాక్సీ డ్రైవర్ అయిన బాలు(సాయి ధరమ్ తేజ్) కారు పేరే సుప్రీమ్. తన వెనకాలే వచ్చే వెహికిల్ వాళ్లు ఎవరైనా హారన్ కొడితే బాలుకి మహా చిరాకు. ఆ హారన్ కొట్టిన వారిని చితక్కొట్టే వరకు ఊరుకునే రకం కాదు. ఆ చిరాకే అతడి మ్యానరిజంని తెలియచెబుతుంది. అటువంటి బాలు తొలిచూపులోనే ఓ మహిళా ఎస్సై బెళ్లం శ్రీదేవి(రాశి ఖన్నా) ప్రేమలో పడతాడు. ఇదిలావుంటే, అనంతపురంలో రాజవంశీయులకి చెందిన వేల ఎకరాల భూములపై విలన్ (కబీర్ సింగ్) కన్నేస్తాడు. ట్రస్టీ ద్వారా దాదాపు 1500 కుటుంబాలకి జీవనాధారంగా కొనసాగుతున్న ఆ భూమిని లాక్కోవడానికి విలన్ ఆదేశాల ప్రకారం మరో విలన్(రవి కిషన్) చేసిన ప్రయత్నాలకి బాలు అడ్డు పడుతుంటాడు. ఆ రాజవంశీయుల కుటుంబానికి బాలుకి మధ్య లింకేంటి ? ఎవరి కోసం బాలు ఈ రిస్క్ తీసుకుంటాడు ? అసలు బాలు లక్ష్యం నెరవేరుతుందా లేదా ? తాను కోరుకున్న శ్రీదేవి తనకి దక్కిందా లేదా అనేదే మిగితా కథనం.
విశ్లేషణ: సినిమా సినిమాకి సాయిధరమ్ తేజ్ యాక్షన్‌లో ఇంప్రూవ్ మెంట్ అయితే కనిపిస్తోంది కానీ అదేమీ అంతగా మార్క్‌‌ని చూపించలేకపోతోంది. మెగా ఫ్యామిలీ హీరో అంటే ఆడియెన్స్ ముఖ్యంగా కన్నేసేది ఫైటింగ్స్, డ్యాన్స్ వంటి అంశాలే. ఈ సినిమాలో సాయి బాడీ లాంగ్వెజ్‌లో ఈజ్ కనిపించినప్పటికీ.. చెప్పుకోదగిన డ్యాన్స్ కనిపించలేదు. వెంకట్ కంపోజ్ చేసిన డిఫరెంట్ ఫైట్స్ కాస్త కొత్తదనం తీసుకువచ్చాయి. డైరెక్టర్ అనిల్ రావిపూడి రాసుకున్న కథ, కాన్సెప్ట్ రెండూ పాతవే. కాకపోతే పటాస్ స్టైల్లో కాస్త భిన్నంగా తెరకెక్కించేందుకు ప్రయత్నించాడు. ఈ క్రమంలో కొన్ని సీన్స్ బాగానే వచ్చినప్పటికీ.. ఇంకొన్ని సీన్స్ దెబ్బతీశాయి. పోలీస్ ఆఫీసర్‌గా రాశి ఖన్నా కామెడీ, గ్లామర్ ఆకట్టుకుంది. ఇక కామెడీ విషయానికొస్తే, రఘబాబు, వెన్నెల కిషోర్, థర్టీ ఇయర్స్ ఇండస్ట్రీ పృధ్వీ రాజ్, ప్రబాస్ శ్రీను అండ్ గ్యాంగ్ జనరేట్ చేసిన కామెడీ బాగుంది. పోసాని కృష్ణమురళి, శ్రీనివాస్ రెడ్డిల బ్యాండ్ మేళం బ్యాచ్ కామెడీ అంతగా వర్కౌట్ అవలేదు. రాజేంద్ర ప్రసాద్, సాయికుమార్‌లు వారి పాత్రల మేరకి మెప్పించారు. సెంటిమెంట్‌తో టచ్ చేయడంలో అనిల్ రావిపూడి మరోసారి తన మార్క్ చూపించుకున్నాడు. విలన్ బ్యాచ్ రవి కిషన్, కబీర్ సింగ్‌ల పర్‌ఫార్మెన్స్ రొటీన్‌గానే వుంది. రాజన్‌గా నటించిన చైల్డ్ ఆర్టిస్ట్ పర్‌ఫార్మెన్స్ బాగుంది. ఇక 'పటాస్' హీరోయిన్ శృతి సోధి విషయానికొస్తే, ఎంట్రీ సాంగ్ కోసం ఎంట్రీ ఇచ్చిపోయే వరకే ఆమె పాత్ర పరిమితం. సాయి కార్తిక్ అందించిన బెళ్లం శ్రీదేవి సాంగ్ బాగుంది కానీ చిరు హిట్ సాంగ్ అందం ఇందోళం సాంగ్ రీమేక్ మాత్రం ఆశించినంతగా మ్యాజిక్ చేయలేకపోయింది. ఒక్కముక్కలో చెప్పాలంటే, అంచనాలు, ట్విస్టులు ఆశించకుండా వెళ్తే సుప్రీమ్ సినిమాని ఎంజాయ్ చేయవచ్చు.
రేటింగ్ : 3
Mobile AppDownload and get updated news