ప్రేక్షకులను తనతో తీసుకెళ్లే  టైమ్ మెషీన్‘‘24’’ 

సూర్య హీరో గానే కాకుండా విలన్ గాను మరో క్యారెక్టర్ మొత్తం 3 పాత్రలలో చేసిన సినిమా 24 . విక్రమ్ కుమార్ దర్శకత్వంలో, ఆస్కార్ అవార్డు విన్నర్ ఎ.ఆర్.రెహమాన్ సంగీత సారధ్యంలో రూపొందిన సైన్ ఫిక్షన్ థ్రిల్లర్ ఇది. 'మనం' లాంటి హిట్ చిత్రాన్ని తెరకెక్కించిన దర్శకుడు కావడం....ఈ సినిమాకు సూర్యనే నిర్మాత కావడంతో సినిమాపై మరింత అంచనాలు పెరిగాయి. ఆ అంచనాలను ఈ సినిమా అందుకోగలిగిందా? అనే విషయం తెలియాలంటే కథలోకి ముందుగా వెళ్లాలి.
కధ:
శివకుమార్(సూర్య) ఒక సైంటిస్ట్. ఇతనికి కవల సోదరుడు ఆత్రేయ(విలన్ సూర్య). శివకుమార్ తన ప్రయోగాల ద్వారా కాలాన్ని కంట్రోల్ చేసే ఒక వాచ్ ను కనిపెడతాడు. దాని మీద దుష్టుడు అయిన ఆత్రేయ కన్ను పడుతుంది. ఎలాగైనా దానిని చేజిక్కించుకోవాలి అనిచేసే ప్రయత్నంలో ఆత్రేయ శివకుమార్ భార్య (నిత్యా మీనన్)ను చంపేస్తాడు. తన కొడుకును, ఆ వాచ్ ను కాపాడుకోవాలని శివకుమార్ పారిపోతాడు. కాని తాను ఆత్రేయ మనుషుల నుంచీ తప్పించుకోలేనని అర్ధం చేసుకుని బిడ్డని, వాచ్ ను రైలులో తనను కలిసిన ఒక మహిళకి అప్పగిస్తాడు. ఆత్రేయకు దొరికన శివకుమార్ ను ఆత్రేయ చంపేస్తాడు. శివకుమార్ బిడ్డను వెదికే క్రమంలో ఆత్రేయ యాక్సిడెంట్ కు గురై కోమాలోకి వెళ్తాడు.శివకుమార్ కొడుకు మణి(యంగ్ సూర్య) వాచ్ మెకానిక్ గా పని చేసుకుంటూ ఉంటాడు. ఒక రోజు తనకు దొరికిన పెట్టెలోని వాచ్ కు శక్తులు ఉన్నాయని, దాని ద్వారా కాలాన్ని కంట్రోల్ చేయొచ్చని తెలుసుకుని దాని సాయంతో తన ప్రేమను ప్రేమించిన సత్య(సమంత)ను పొందుతాడు. ఇక 26 ఏళ్ళ తరువాత కోమా నుంచి లేచిన ఆత్రేయ ఆ వాచ్ మణి దగ్గర ఉందని తెలుసుకుంటాడు. ఆత్రేయకు ఆ వాచ్ దొరికిందా? మణి తన తల్లితండ్రుల గురించి తెలుసుకున్నాడా లేదా? మణి ఆత్రేయను గెలిచాడా లేదా అనేది స్టోరీ.
విశ్లేషణ:
కథలో ప్రేక్షకులను లీనం చేసేలా నడపటం అనేది సినిమాకు మొదటి లక్షణం. ఆ టెక్నిక్ విక్రంకు బాగా తెలుసని మనంతో రుజువైంది. ఇప్పుడు సూర్య సినిమాతో అది మరింత రుజువుచేసుకున్నాడు. చిన్నపిల్లలకు ఫిక్షన్ కథ చెబితే ఎంత ఎగ్జైట్ అవుతూ వింటారో అలా ప్రేక్షకులు ఫీలవుతూ కథలోకి కథాకాలంలోకి వెళ్లేలా చేశాడు. కథనం కథతో బాటే సాగుతుండటంతో ప్రేక్షకులు లాజిక్ గురించి ఆలోచించకుండా దర్శకుడి వెంటే వెళుతూ సినిమా ఆసాంతం ఎంజాయ్ చేయగలుగుతారు. రెండు గంటల 40 నిముసాలపాటు ఎక్కడా బోర్ కొట్టించకుండా తీయగలగటమే దర్శకుడి గొప్పతనం. ఇక హీరో విషయానికి వస్తే ఈ సినిమా తన కోసమే తీసినట్లు సూర్య చేశాడు. ఆత్రేయ పాత్రలో అయితే అదరగొట్టేసాడు. ఇక మణి పాత్రలో యంగ్ లుక్ తో సూర్య మరింత అందంగా ఉన్నాడు. 3 పాత్రలలోనూ వైవిధ్యం చూపుతూ తన టాలెంట్ చూపించాడు. ఇక నిత్యా మీనన్ ఉన్నది కొద్దిసేపే అయినా తన పాత్రకు న్యాయం చేసింది. ఇక యంగ్ సూర్యతో జతకట్టిన సమంత క్యూట్ గా ఉంది. ఇక సూర్య పెంపుడు తల్లి పాత్రలో శరణ్య, అజయ్ తమ తమ పాత్రలలో ఒదిగిపోయారు. దర్శకుడు విక్రం కుమార్ హీరోతో పోటీపడి సినిమాను తానై నడిపించాడు. రెహమాన్ పాటలు ఆకట్టుకుంటాయి.
రేటింగ్ 4\5