బ్లాక్‌బస్టర్ చిత్రం టీమ్‌పై ఐటీ దాడులు!

సినిమాలు ఫ్లాప్ అయితే నిర్మాతలపై ఫైనాన్షియర్స్ దాడులు.. సూపర్‌హిట్ అయితే ఇన్‌కమ్‌టాక్స్ దాడులు తప్పవు మరి. ఈ కోవలోనే చిన్న చిత్రంగా విడుదలై ఘనవిజయం సాధించిన 'కుమారి 21ఎఫ్' టీమ్‌‌తోపాటు వారి కార్యాలయాలు, నివాసాలపై ఆదాయపు పన్ను శాఖ వాళ్లు సోదాలు జరిపినట్లుగా విశ్వసనీయ సమాచారం. ఆలస్యంగా వెలుగులోకి వచ్చిన ఈ న్యూస్ వివరాల్లోకి వెళితే.. ప్రముఖ దర్శకుడు సుకుమార్ నిర్మాతగా మారి నిర్మించిన తొలిచిత్రం 'కుమారి 21ఎఫ్'. ఈ చిత్రానికి సుకుమార్‌తో పాటు థామస్ రెడ్డి, విజయ్ బండ్రెడ్డిలు కూడా నిర్మాతలుగా వున్నారు. ఇటీవల విడుదలైన ఈ చిత్రం బ్లాక్‌బస్టర్ విజయాన్ని నమోదు చేసుకుంది. దాదాపు రూ. 20 కోట్ల వరకు ఈ చిత్రం కలెక్ట్ చేసిందనే వార్త ఆనోట.. ఈ నోట ఇన్‌కమ్‌టాక్స్ వారికి కూడా చేరింది. ఇంకేముంది.. ఇన్‌కమ్‌టాక్స్ టీమ్ 'కుమారి 21ఎఫ్' టీమ్ ఆఫీస్, ఇళ్లల్లో సోదాలు నిర్వహించారట. అయితే అప్పటికి పక్కా అకౌంట్స్ రెడీ చేసుకున్న సుకుమార్ అండ్ టీమ్‌పై ఆ దాడి పెద్దగా ప్రభావం చూపలేదని.. కేవలం రికార్డులు పరిశీలించి... కట్టాల్సిన టాక్స్ అమౌంట్ చెప్పి.. ఇన్‌కమ్ టాక్స్ టీమ్ వెళ్లిపోయారని తెలుస్తోంది. సో.. ఆడియెన్స్‌తో పాటు ఇన్‌కమ్‌టాక్స్ వాళ్లను కూడా కుమారి టీమ్ బాగానే మెప్పించిందన్న మాట.