ఇరాక్ తొలి బ్యూటీ క్వీన్ వచ్చేసింది!

స్త్రీలు ముఖంతో సహా శరీరమంతా కప్పుకుని తిరగాలనే కరడు గట్టిన ఇస్లామిక్ భావజాలానికి కేంద్రంగా మారిన ఇస్లామిక్ దేశాల్లో ఒకటైన ఇరాక్‌లో ఇప్పుడిప్పుడే పరిస్థితుల్లో మార్పులొస్తున్నాయి. ఆ దేశంలో ఇటీవల జరిగిన మిస్ ఇరాక్ పోటీలే ఇందుకు ఉదాహరణగా చెప్పుకోవచ్చు. శనివారం నాడు బాగ్దాద్ నగరంలో జరిగిన ఒక కార్యక్రమం ఆ దేశానికి 40 ఏళ్ల తరువాత తొలి మిస్ ఇరాక్‌ను అందించింది. వాస్తవానికి అందాల పోటీలనగానే స్విమ్ సూట్లు ధరించిన అందగత్తెలు గుర్తుకొస్తారు. కానీ, అలాంటిదేమీ లేకుండా తీరయిన వాతావరణంలో మిస్ ఇరాక్ కాంటెస్ట్ జరిగింది. 1972 తరువాత ఇరాక్ లో అందాల పోటీలు జరగడం ఇదే తొలిసారి. నియంతల పాలన, యుద్ధాలు, తీవ్రవాదం, కరడు గట్టిన ఇస్లామిక్ భావజాలం ఆ దేశంలో స్త్రీలను నాలుగు గోడలకే పరిమితం చేసాయి. పొడవాటి శరీరం, నీలికళ్లతో ఆకట్టుకునే 20 ఏళ్ల షయామా అబ్దెల్ రహమాన్ అనే యువతి మిస్ ఇరాక్ కిరీటాన్ని గెలుచుకుంది. చాందసవాదుల బెదిరింపులకు లొంగకుండా షయామా మిస్ ఇరాక్ పోటీల్లో పాల్గొని శభాష్ అనిపించుకుంది. కిరీటాన్ని కైవసం చేసుకున్న అనంతరం షయామా మాట్లాడుతూ చాందసవాదం కారణంగా ఇరాక్ ఇప్పటివరకు మిగతా ప్రపంచం కన్నా వెనకపడిపోయిందని, ఇప్పుడిప్పుడే తమ దేశం ఆ సంకెళ్లను తెంచుకుని ముందుకు సాగడం తనకు ఆనందం కలిగిస్తోందని చెప్పింది. పోటీల ఫైనల్స్ లో పాల్గొన్న వారంతా షయామా పేరును ముక్తకంఠంతో ఘోషించడంతో నిర్వాహకులు ఆమెకే టైటిల్ ఖరారు చేసారు.

ఇరాక్ ప్రజలు జీవితాన్ని ప్రేమించరనే ప్రచారం బయటి ప్రపంచంలో ఉంది. ఈ తరహా పోటీలను నిర్వహించడం ద్వారా మాకు కూడా జీవితంపై ప్రేమ ఉందని చెప్పడమే దీని ఉద్దేశమని నిర్వాహకుల్లో ఒకరైన హమామ్ అల్-ఒబెయ్దీ చెప్పారు.