`జెంటిల్‌మ‌న్` ఆడియో లాంచ్ డేట్

నాని హీరోగా న‌టించిన తాజా చిత్రం `జెంటిల్‌మ‌న్‌`. మోహ‌న‌కృష్ణ ఇంద్ర‌గంటి ద‌ర్శ‌క‌త్వంలో 'ఆదిత్య 369', 'వంశానికొక్కడు' వంటి ఎన్నో విజయవంతమైన చిత్రాలను నిర్మించిన శ్రీదేవి మూవీస్ సంస్థ అధినేత శివలెంక కృష్ణప్రసాద్ ఈ చిత్రాన్ని నిర్మిస్తున్నారు. 'అష్టా చమ్మా' తర్వాత అంటే దాదాపు ఎనిమిదేళ్ల త‌ర్వాత నాని, మోహనకృష్ణ ఇంద్రగంటి కాంబినేషన్లో రూపొందుతోన్న చిత్ర‌మిది. ఇందులో సురభి, నివేదా థామస్ హీరోయిన్లుగా న‌టించారు. ఇటీవ‌ల విడుద‌లైన తొలి టీజ‌ర్‌కు అద్భుత‌మైన స్పంద‌న వ‌స్తోందని యూనిట్ సభ్యులు ఆనందం వ్యక్తంచేస్తున్నారు.

ఈ సంద‌ర్భంగా నిర్మాత‌ శివలెంక కృష్ణ ప్రసాద్ మాట్లాడుతూ.. ``గురువారం విడుద‌లైన మా టీజ‌ర్‌కి చాలా మంచి స్పంద‌న వ‌స్తోంది. ప్ర‌స్తుతం రీరికార్డింగ్ ప‌నులు జ‌రుగుతున్నాయి. మ‌ణిశ‌ర్మ అద్భుత‌మైన సంగీతాన్ని అందించారు. ఆయ‌న స‌మ‌కూర్చిన సంగీతం చిత్రానికి హైలైట్ అవుతుంది. ఈ నెల‌ 22న పాట‌ల‌ను విడుద‌ల చేస్తున్నాం. అంద‌మైన రొమాంటిక్ థ్రిల్ల‌ర్ ఇది. అన్ని ర‌కాల భావోద్వేగాలతో అన్ని వ‌ర్గాల ప్రేక్ష‌కులూ చూసేలా ప‌సందుగా ఉంటుంది. జూన్‌లో చిత్రాన్ని విడుద‌ల చేస్తాం`` అని అన్నారు.