ఆ హార్మోన్ యవ్వనంగా ఉంచుతుందట

నిత్య యవ్వనంగా వుండాలంటే అందరికీ ఎంతో ఇష్టం ఎందుకంటే మనిషి జీవితంలో యవ్వనం ఎంతో అపురూపమైనది. యవ్వనం మనిషికి కొత్త జవజీవాలను ఉత్పాహాన్ని, అందాన్ని, ఆనందాన్ని ఇస్తుంది. యవ్వనంలో వుండగా మన అందం, మన సామర్ధ్యం మన శక్తి రెట్టింపు అయినట్టు కనబడతాయి. జీవితంలో కొత్తకొత్త ఆశలు కలుగుతుంటాయి. బాల్యం అమాయకత్వంతో, వృద్దాప్యం అనారోగ్యాలతో గడిచిపోతుంది. అందువల్ల మనం ఏమి చేయాలన్నా యవ్వనంలోనే చేయాలి. మరి అంత అందమైన, అపురూపమైన యవ్వనం దీర్ఘకాలం నిలిచి వుండాలని ప్రతి ఒక్కరూ కోరుకోవడంలో తప్పేమీ లేదు. తాజాగా బ్రెజిల్, అమెరికా శాస్త్రవేత్తలు ఇందుకు సంబంధించి ఒక విషయాన్ని కనుగొన్నారు. మానవ కణాల్లో వయోభారాన్ని తిరోగమింపజేసే హార్మోన్ ఒకదాన్ని గుర్తించారు. ఇది మనషుల్ని చిరాయువులుగా చేయకపోయినా వయోభారంతో వచ్చే సమస్యలకు చెక్ పెడుతుంది. ఇది ఓ పురుష హార్మోన్. పేరు డనాజోల్. కృత్రిమంగా తయారు చేసిన ఈ హార్మోన్.. టీలోమరేజ్ అనే ఎంజైమ్ ఉత్పత్తిని ఎక్కువ చేస్తుంది. ఈ ఎంజైమ్ మన కణాల్లోని క్రోమోజోమ్‌ ల చివరలో ఉండే టీలోమర్లు కుంచించుకుపోకుండా చేస్తాయి. వయసుతోపాటు ఈ టీలోమర్ల పొడవు తగ్గిపోతుందనే విషయం ఇప్పటికే గుర్తించారు. కణ విభజన జరిగిన ప్రతిసారి టీలోమర్ల పొడవు కొంత తగ్గుతుందని, అవి పూర్తిగా లేని స్థితి వచ్చినపుడు కణం చనిపోతుందని బ్రెజిల్‌ లోని సా పాలో యూనివర్సిటీ శాస్త్రవేత్త రోడ్రిగో కలాడో చెబుతున్నారు. టీలోమరేజ్ ఎంజైమ్ ఈ ప్రక్రియను నిలిపేస్తుంది కాబట్టి కణ విభజన కొనసాగుతుందన్నమాట.