గాలిబెయిల్ స్కాం నిందితుడు మృతి

హైదరాబాద్: గాలి జనార్థన్ రెడ్డి బెయిల్ స్కాంలో నిందితుడిగా ఉన్నమాజీ న్యాయమూర్తి ప్రభాకర్ రావు అనుమానాస్పద స్థితిలో మృతి చెందాడు. ఈస్ట్ మారెడుపల్లిలోని ఆయన నివాసంలో సోమవారం ఉదయం ఈ ఘటన చోటు చేసుకుంది . అయితే ప్రభాకర్ రావు ఆత్మహత్య చేసుకున్నట్లు ఊహాగానాలు వెలువడుతున్నాయి. ఆత్మహత్య చేసుకున్నాడా (లేదా) గుండెపోటుతో మృతి చెందాడా అనే విషయం పోలీసు విచారణలో తేల్సాల్సి ఉంది.

మైనింగ్ అక్రమ తవ్వకాల కేసులో అరెస్ట్ అయిన గాలి జనార్థన్ రెడ్డికి బెయిల్ ఇచ్చేందుకు కోట్లాది రూపాయలు డీల్ కుదుర్చకున్నాడనే ఆరోపణలపై మాజీ న్యాయమూర్తి ప్రభాకర్ రావును ఉద్యోగం నుంచి సస్పెండ్ చేసిన విషయం తెలిసిందే. అనంతరం కొన్ని రోజులు జైల్లో గడిపి ఆ తర్వాత బెయిల్ పై బయటకు వచ్చాడు. తదనంతరం ఆయన ఈస్ట్ మారెడుపల్లిలోని ఆయన నివాసంలో ఉంటున్నాడు. సోమవారం ఉదయం ఆయన మృతి చెందడం అనేక అనుమానాలకు దారితీస్తోంది.